AJEG PANCEG DINA TETENGER BUDAYA

Ajeg panceg dina tetenger budaya
ABAH RACHMAT ISKANDAR
Bubuka
Budaya teh mangrupa hasil rekayasa lahir batin manusa kana mangsa nu keur dijamananana.. Budaya heubeul teh eunteung gede pikeun nyoreang nyawang kahirupan mangsa bihari jangeun pieunteungeun kiwari maetahkeun kahirupan mangsa baring supagi.
Budaya kiwari teh kudu ngeunteung kana budaya heubeul ciptaan manusa baheula, sabab budaya anyar nu teu ngeunteung ka budaya heubeul tangtu bakal leungiteun galeuh kakuatan kahirupananana.
Contona bae, munjungan atawa silih hampura dina mangsa lebaran saenyana bisa sakadar make MMS , SMS, blackberry atawa skype , parabot aheng ciptaan budaya kiwari nu nyambungkeun manusa jeung manusa bari teu kahalangan ku rohang jeung waktu. Sarwa praktis sarwa efisien, irit ongkos irit waktu. Tapi kahade, telepon selular mah moal bisa nembreskeun sikep emosional mangsa lebaran. Jiga sasalaman, silih tembongkeun kasono, sumeleketna rasa tambelar joledar ka nu jadi kolot mangsa urang sumujud menta dihampura ka kolot urang, atawa leungitna suasana batin nu diwuwuh kaendah kagumbiraan mangsa urang balakecrakan jeung pada batur dina mapag lebaran. Make telepon mah, papada urang teh ukur diunggang ku kekecapan, lain ku sikep-sikep emosional nu saenyana bisa meungkeutkeun rasa mibanda antara kulawarga utamana papada urang jeung urang .
Dina kahirupan lingkungan alam, manusa kiwari geus mimiti leungiteun leuweung nu memehna rea liang cai (cinyusu) nu bisa medalkeun cai nu ngagulidag pikeun kahirupan , nyeboran kebon jeung sawah pilahaneun. Sono kana hejona kebon jeung amparan sawah nu sedeng koneng umyang, sono ningali pasir-pasir jeung lengkob nu hejo ngemploh mapaesan alam Sunda, angin tiis ngahiliwir mepende hirup hurip di lemah cai panginditan sarakan geusan pamulangan.
Tangkal kiara, haripingku, karet munding, kepuh, calik angin atawa caringin nu baheula ngurung pasir-pasir di luhureun lembur katut tatangkalan leutik kayaning kalimorot, jamuju, manglid, saninten, puspalilin , bungur atawa senokeling, kabeh geus lita dirakrak kasarakahan jalma-jalma nu cenah hayang nyieun budaya anyar, budaya moderen tea. Gunung bulistir, sawah jadi imah, kebon jadi lembur, cinyusu geus leungit tanpa lebih, ilang tanpa karana, jadi selang-selang plastik nu nyungakang ranteng pabeulit ngahalangan lelengkahan. Cai ti gunung geus lila ngorotan. Sawah lendo geus lila jadi imah, dunya geus teu aya aling-aling. Panonpoe nu moreret geus teu kahalangan ku tatangkalan atawa reuma di leuweung nu baheula carang katincak jelema.
Hasil rekayasa budaya manusa jaman kiwari nu miceun budaya heubeul nu kungsi jadi tetenger karuhun urang pikeun nyingkahan laku manusa pikeun ngarakrak alam. Carita aheng soal ratu jin dina cinyusu, kuntianak dina tangkal caringin, leuweung nu sanget nu kawentar entog silumanna, kiwari geus disingkahkeun ku basa tahayul bari jeung teu malire yen wawadi karuhun teh nyumput dina gunung simbul, nyangling dina pasir silib , kumambang dina sagara siloka. Naon sababna baheula percaya kana jurig jeung dedemit siluman barakasakan, sabab kolot baheula ngahaja ngawuwuh carita jurig teh sangkan jalma teu kumawani ngagunasika leuweung jeung tatangkalan nu saenyana jadi bagean tina cara manusa ngarumat alam katut kahirupanana.
Conto-conto bieu teh ngagambarkeun kumaha lembur ancur, desa lita, dayeuh ukur amparan beton nu diuga ku urat-urat kabel listrik jeung telepon sarta pasulabrengna napsu-napsu manusa dina motor, dina mobil jeung kahirupan nu sing sarwa hedonistis, ukur ngudag-ngudag kasenangan nu can aya, ukur balap moro kasenangan nu teuing dimana pungkasanana.Antukna timbul bahla alam dimana-mana. Aya longsor nu nerebkeun lembur, aya banjir bandang nu malidkeun harta banda, dimana-mana gunung dak dumadak bararitu, geus puguh ari lini jeung tsunami mah meuweuh di satungkebing jagat.
Ieu teh nu jadi lantaranana teu lian lantaran manusa geus ninggalkeun budaya heubeul nu kungsi jadi kayakinan manusa jaman baheula. Geus teu aya mupuhunan mangsa panen, geus teu aya guar bumi mangsa rek molah, teu aya buku taun atawa ngaruwat lembur jangeun sukuran ka dzat Maha Agung nu geus nyiptakeun alam kalawan sampurna. Sabab jelema geus teu percaya kana mitos Batara Kala, geus teu percaya kana hadirna dedemit ratu jin Leuwi Hieum, Raja siluman Kendrawahana nu ngayuga leuweung tutupan. Hiji silib, hiji siloka kolot baheula dina ngarumat alam. ***

IDUL FITRI

I barat kaen nu bodas nyacas
D iri urang diseuseuh dina Rahmat Gusti
U rut sataun campleng balas tatu ku cucuk kahirupan
L ebah dieu pangampura Gusti dilungsurkeun ka sakuliah jagat

F itrina urang sadaya sakedap deui baris kapimilik
I barat murangkalih anu nembe gubrag lahir ka alam dunya
T angtosna suci bersih tina sagala rupa rereged dunya
R asa bagja moal tiasa kaukur ku rumpaka bahasa pujangga
I Insya Allah kedap deui urang boboran syiam..

" GUPAY PILEULEUYAN KANGGE ABAH ASEP SUNANDAR SUNARYA "

" GUPAY PILEULEUYAN KANGGE ABAH ASEP SUNANDAR SUNARYA "
=== INNALILLAHI WA INNA ILAIHI ROJI'UN ===

Poe ieu..
Langit asa ngadadak mendung kalimpudan ku mega hideung
Angin nu ngahiliwir nambahan nyereset kana ati sanubari
Estu matak ngageuingkeun lelembutan diri
Najan batara alam nu endah mukakeun gapura sagara hirup
Teu ngajadikeun palidna sagala rupa lalangse hate..

Asa teu percaya kana dedengean..
Asa teu percaya kana titingalian..
Mun teu inget kana kodo jeung kodar ti Pangeran
Tangtuna rebuan pananya bakal rabeng nganaha naha.



Tadi tengah poe..
Dulur kuring..sepuh kuring.. sobat kuring.. ikhwan kuring.. guru kuring
Tos dipundut kunu rahayu.. diala kunu laksana.. mulang ka Rohmatullah..
Kuring bakal kaleungitan pupuhu nu linuhung ku elmu..
Kuring bakal kaleungitan ku budayawan sunda nu sagala bisa

Wilujeng angkat " ABAH ASEP SUNANDAR SUNARYA "..
Mugia salira mulang nyangking ranggeuyan kabagjaan..
nyandak weningna ati anu suci.. nyandak kasolehan manah..

Simkuring sakulawargi mung tiasa kedal du'a
Mugia sagala rupi amal nu kantos dipilampah..
Ditampi ku Allah nu ngawasa jagat raya..
Oge mugia sagala rupi kalepatan boh nu ageung atanapi anu alit
Sing kengeng pangapunten ti manten_Na.. aamiin..

Oge teu kakantun ka kulawargina nu dikantunkeun..
mugia sing dipaparinan kasabaran sinareng katabahan dina nampi ieu cocobi..

A ya paribasa, jodo pati bajga jeung cilaka mung Allah anu uninga
S asat manusa mah ngan ukur ngabogaan rencana jeung cita cita
E stu sadaya katangtuan mung Allah nu ngagaduhan taqdir
P oe kamari jagjag waringkas, poe ieu kabejakeun ngantunkeun

S umebar kalawarta ka sakuliah nusantara..
U rang jelekong " Kang Asep Sunandar Sunarya " cikeneh ngantunkeun
N inggalkeun alam pana, nuju ka alam abadi..
A sa teu percaya kana kalawarta nu sumebar di dunia maya
N anging aya paribasa taqdir teu beunang dipungkir..
D a kangaranan maot mah geus jadi hakna nu nyawaaan
A hir barangkali pasti bakal dijemput ku pati
R eueuh tina kahirupan pana, nuju kana kahirupan abadi

S ing salabar ka kulawargina nu nuju kapapatenan
U rang do'akeun almarhum sing ditampi iman sareng islamna
N u ngantunkeun sing ditampi sagala rupi amal saena
A nu awonna sing kengeng pangmpura MantenNa
R asa kaleungitan tangtos bakal eunteup di diri urang sadayana
Y akinkeun eta hal tos mangrupikeun guratan taqdir Allah
A nu moal bisa leupat ti sakabeh umat manusa..

KANYA'AH INDUNG BAPAK

" KANYA'AH INDUNG BAPA "

Dina iuh iuh kanya’ah indung...
Nu seungit marganing wuyung
Dina sela sela renghapna kanya’ah bapa
Nu ngagulidag rosa mapakan sagara
Moal aya saurang oge
Nu bisa mapakan nya’ahna indung jeung bapa

Ema...
Salapan bulan anjeun ngakandung abdi
Lain hal nu enteng dina ngalakonannana
Tapi anjeun estu teu pernah aral subaha
Malah ngado’akeun sangkan hirup abdi waluya..

Ema… bapa..
Rumaos diri teh sok baha
Loba mungpang pangwawadi
Teu gumati kana sagala piwejang
Hapunten abdi.. ema.. bapa..

Ya Allah.. mugia maparin ampunan
Ka abdi sareng ka ibu rama abdi
Ya Allah.. mugia mikawelas mikaasih
Ka ibu rama abdi nu ageung jasana

Robigfirli wali wali daya...
Warhamhuma kama Robbayani shagiro
Ya Allah ya Karim nu Maha Rohman tur Maha Rohim
Mugia ngabulkeun sagala rupi do’a abdi..

PAPATAH NU JADI INDUNG

" Papatah nu jadi indung "

Anaking..
Geura prak eunteungeun diri pribadi...
Basa mah gambaran rasa..budi mah gambaran ati..
Dina raga urang asa hate leutik..
Nu salwasna tara daek ngabohong, jeung di bohongan
Jaga diri masing nastiti, dumugi mapagna pati

Anaking..
Mungguh hirup estu katungkul ku pati..
Maot teu apal di mangsa..
Kade hirup masing ati ati ngajaga lampah jeung basa
Sing repeh rapih.. beres roes.. akur reujeung sasama
Tengetkeun ku hidep..
Mahluk nu sugih hartina, beunghar harta..
Insya Allah bakal waluya hirup kumbuhna

Anaking..
Prak sing bisa maca .. bisa ngaji..
Ngajina sing nepi kana tungtung ati..
Macana sing napak kana tungtung rasa.
Tumutkeun pitutur Rosul, taat parentah agama
Insya Allah hidep bakal bagja dunya.. bagja aherat

Anaking..
Geura sungsi elmu sing nepi katimu
Geura alap harta sing nepi ka ala mangpaatna
Najan lengkah kahalang jurang jeung jungkrang…
Teu aya alesan keur hidep ngahontal sagala kahayang
Prak di ajar sing tekun keur neuleuman eusining hirup…
Sawang mangsa nu bakal datang..
Nu katukang ..prak sing jadi pieunteungeun

Kade anaking...
Nyukcruk elmu.. nyuprih harti sing nepi ka jucung..
Ulah kabengbat hal anu mawa tugenah ... mawa cilaka diri...
Ulah….ulah ngalelebar diri..
Hidep teh sirung harepan indung jeung bapa..
Nu baris ngalalakon di mangsa nu bakal datang.

BAPAK

Bapa....
Mung ukur tiasa kedal ucap hapunten abdi,, salami bapa jumeneng tangtos abdi sareng palaputra bapa nu sanesna seueur ngarepotkeun lahir batin salira. Tingawitan abdi sadaya gubrag ka alam dunya tug dugi ka ayeuna tos tiasa cumarita dina nyungsi kahirupan, estu teu acan tiasa mulang tarima kanu janten sepuh.. hapunten abdi bapaaa ...

Kiwari ....
Bapa tos ngatunkeun abdi sadaya.. mulih ka Rohmatullah, abdi sadaya mung ukur tiasa jajap ku ranggeuyan du'a ka Allah Azawazalla..
Nun Gusti nu Maha uninga kana keretegning ati,...mung ka Gusti ieu diri sumerah. Deudeul Du'a kangge Pun Bapa nu tos tingtrim dina pangkonan Gusti, mugia Almarhum sing ditampi sagala rupi amal ibadahna, dihapunten tina sagala rupi dosana.. boh nu ageung atanapi nu alit, mugi dicaangkeun di alam kuburna, oge ditempatkeun dina tempat nu pinuh ku rahmat Gusti... Aamiin.

NASIB

@ Nasib @
" Ya Allah... " teu kebat ngucapna, leungeuna ngusap beungeut nu baseuh ku cihujan. Hujan ngaririncik ti peuting mula. Hawa tiris nerekab ngalimpudan alam. Jam 2 peuting, suuk meunang ngulub ditanggung ku rancatan dibawa ka pasar. Lamun batur mah keur meujeuhna tibra saré. Lamun batur mah keur meujeuhna betah ngimpi. Mang Cartim nagog disisi jalan émpér jongko, nungguan nu meuli sabari ngahodhod katirisan. Tukang suuk rancucut baseuh bati kahujanan. Baju jibreg ku cihujan campur késang. Kasab lain teu hayang jiga batur, jadi karyawan atawa bos dihiji pausahaan. Tinggal diuk na korsi alus, duit nu dararatang sabari pakéan ginding.
" Pa! Iraha abdi badé mésér Acuk téh?" kecap éta nu terus dédéngéeun na ceuli jeung ingetan Mang Cartim. Sora anakna nu hayang dipangmeulikeun baju lebaran.
Puguh sakola SD gé teu tamat, komo kuliah. Henteu pisan ngalaman jadi mahasiswa, komo jadi sarjana. Nya wayahna kasabna sakabisana. Najan payu ukur saeutik, najan boga bati ukur saeutik, teu eureun nya ngusahakeun. Mélaan nu jadi kulawargana, Mang Cartim réla capé jeung sangsara nu penting kulawargana manggih kasenangan.

MAPAG RAMADHAN

M anjing ka wanci nu bihari, ninggang ka mangsa nu sampurna
A yeuna sakumna umat muslim ngawitan ngalaksanakeun ibadah shaum
P ancen tugas ti Allah kangge ngalaksanakeun rukun islam nu ka opat
A nu wajib dilaksanakan ku satiap insan nu ngaku muslim
G eusan nyucikeun diri tina rereged hirup nu dilakonan sataun linana

R asa bagja pasti ngancik dina diri urang sarerea
A yeuna pisan waktuna keur ngais amal nu saloba lobana
M angpirang pirang pahala nu bakal katarima geus moal kaukur jumlahna
A sal ngalakonannana teu mengpar tina aturan nu diguratkeun ku Rosul
D adasaran ku kaimanan nu kuat dibarengan miharep karidoan Allah
H asilna Insya Allah bakal malikeun deui jiwa manusa kana fitrahna
A hirna,, hayu bageakeun sasih ramadhan ieu ku kaweningan hate
N iatan nu kuat sangkan kasucian diri bisa kapetik hasilna kaala buahna

Wilujeng ngalaksanakeun shaum taun 1435 H / 2014 M, mugia shaum urang mabrur.. aamiin

Pantun Sunda

Poe salasa tumpak kuda
kuda paninggalan walanda
urang mah urang sunda
atuh pake basa sunda


kangkung diasakan ku randa
ngeunah pisan rasana
angklung teh asli ti sunda
kuring nu bogana


aya pawang buhaya
pawangna ulin ka persia
kudu nyaah kana budaya
bisi dicolong ku malaysia



hayang ulin ka gunung gede
di gunung aya buhaya
urang sunda sing harade
sing nyaah kana budaya



ulin ka jalan juanda
sawaktos bulan puasa
mun ngaku urang sunda
tong poho kana basa



aya jalma teu boga alis
sabab getol dikerokna
neng geulis tong gumeulis
sabab rujit nenjona



baju teh apan disewakeun
disewakeun ku indung sia
basa sunda sok atuh gunakeun
saeuncan diaku ku malaysia


aya huma dekeut situ
eta huma nu bogana randa
naha urang sunda teh kitu
alim nyarios ku basa sunda

LEUNYEUPAN

Anaking…!!
Sok lenyepan ieu pepeling..!!
Kahirupan teh lir ibarat kapal nu keur ngambah samudra..
legana parat ka langit.. jerona satunjang jagat..
Pangeusina salaksa haq, saketi batil..satumpuk kamaksiatan
Hade jeung goreng bagja katut cilaka, estuning pagaliwota..
Keur sorangeun ..teuleumaneun.. eunteunganeun jeung piliheun hidep…

Anaking…. !!..
Bral geura beberkeun layar bari pinuh pangharepan
Kapalna wujudkeun kataqwaan..
Eusina pinuhan ku kaimanan..
Umbul-umbulna tancebkeun dienul Islam..
Padomanana turut tumut sunah Rosul
Balabuhna lebah palataran katengtreman..
Insya Allah kapal hidep bakal kuat norobos lambak sagara..
Di tengah mijahna galura kahirupan.

PATURAI TINEUNG

Bapa,, sinareng Ibu guru,,,

teu karaos juringkangna mangsa
mung ukur sakiceup panon nyorang tilu taun nu kalangkung
janten sajarah nu ngait ngeukeumbing ati
nalika abdi sadaya nyungsi pirang pirang panineungan
dina rohangan nu pinuh kaendahan hate
bapa/ibu guru kalawan ihlas ngaping ku salaksa cinta
ngatik ngadidik ku sagala kahemanan
reueus nu ngancik dina sagara sieup
marengan tilu wanci nu janten saksi

mangsa diri nyawang lalakon nu panjang
salaksa rumasa nangtawing lebah lungkawingna cimata
mangsa pangaweruh rebo maseuhan raga
katumarimaan hate estu teu tiasa kaukur ku catur
nyambuang mapay galur lelembutan

ayeuna ningang mangsana..
abdi sadaya seja nyusul punlanceuk
di paguron nu langkung jumhur
seja ngalap pangabisa keur lumangsungna kahirupan

pileuleuyean bapa/ibu guru nu jalumhur
abdi sadaya tilu taun nyoceng umur salira
teu aya kecap nu tiasa dikedalkeun
mung ukur ngagulidagkeun dareuda
tina lampah abdi sadaya nu kalintang rosana

pileuleuyean sakola nu dipicinta
harepan teh mugia urang tinemu bagja
neda pidua ti sadayana
abdi sadudulur seja undur diri
rek miang nembus mega malang
jaga... mun elmu kaparengan masagi
abdi sadaya seja ngalalakon
lumampah geusan babakti ka nagara

cag...

Duh Gusti bukakeun panto tobat

Duh Gusti bukakeun panto tobat …. hate ceurik balilihan
Inggis Gusti bendu liwat saking, rempan teu masihan waktos
Kanggotobat kamantena Gusti hampura abdi

Sumangga abdi pasrah badan sakujur
Tumarima kana kadar pinuh ku dosa
Anging Gusti anu uninga kaayaan abdi saleresna
Hate abdi balilihan seja pangampura salira.

Ari karep tara salah, ngan kanyataan jauh tina lamunan.
Raga ukur katempuhan napsu nu mawa lengkah
Nincak kana jalan salah,awak nu katalangsara

Duh Gusti hampura abdi mungguh kadar diri
nasib anu mawa jaman saha anu baha kana takdir tos jadi guratan illahi
Duh gusti manga nyanggakeun diri tos lamokot ku dosa salira tos kauninga sadaya-daya abdi tumarima

mungguh jalmi gudangna kasalahan tapi Gusti langkung uninga
Jalmi tara salamina salah mungguh allah lautan hampura
Tumarima kana kadar jasad pinuh ku dosa
Sumangga abdi pasrah badan sakujur

MAPAG CALON PANGANTEN PAMEGET

MAPAG CALON PANGANTEN PAMEGET
SORA :

Mitra…… Aya harewos ti angin nu dating mawa bewara ,Cenah bakal panganten dijajap ku ibu rama, diwuwuh ku para sepuh , diiringkeun kdang wargi. Ayeuna ngabujeng ka ieu patempatan, hayu urang wilujengkeun , mangga urang bageakeun

NGABAGEAKEUN CALON PANGANTEN PAMEGET
SORA :
Anaking mun cunduk neda paralun , unggah dipacuankeun , lamun acan dirampeskeun, sasmitaning bemakrama, unjuk salam ka Islaman as.wr.wb.
Jagong tuhur meunang ngunun , haturan wilujeng sumping.
Bagea nyanggakeun salam patepang,
Marhaban ahlan wa sahlan bi hudlurikum.


Asih nu ngamalir bukti teu jalir,
katresna nu mangkak tetela henteu sulaya.
Di awur pangjurung ti indung nu ngakandung,
dipulans pangjajap ti bapa nu ngayuga.

(calon panganten miwah rombongan ditahan dina lalawangan)

SORA :
Ka kulawargi calon panganten istri bisi si jalu hanjelu bisi si ujang honcewang sumangga geura papag geura hayap calon panganten pameget miwah rombongan .

(rombongan dipapag)

SORA :
Kasep nu dianti ti – kamari ditunggu ti – isuk-isuk ayeuna parantos cunduk dijajap ku ibu rama, diwuwuh ku para sepuh di iring ku kadang wargi

Baeu kadieu ………..
Geura tampi runtuyan kembang pangrungrum ti-nu bakal jadi indung , geura tampa kongkorong mangle siloka kanyaah ti-nu bakal jadi bapa

(manglena dikongkorongkeun, diterasskeun musafahah)

Salajengna sumangga nu sumping digingsir linggih ,
Enggal dipiwarang lenggah .
Tutut gunung keong reuma sumangga geura gek calik,
mugi masing getah benah ngantos acara anu salajengna.
BUBUKA
SORA :
Bis …as … wr. wb

Alhamdulillaahiladzi an’ama ‘alainaa bini’matil iimani wal islam .
Asyhadu alaa ilolaha illallah wahdahu laa syarikallah wa asyhadu anna muhammadan ‘abduhu warosuluh .
Allahuma shali wasallim ‘ala muhammadin wa’ala alihi waashabihi ajma’in, amma ba’du. Wa min ayaatihi ‘an kholako lakum min anfusikum awaaja litaskuunuu ilaiha, wa ja’ala bainakum mawaddatan warohmah , inna fiidzaalika la aayatil liqoumiy yatafakkaruun.

Puji nu janten panyinglar ria sareng sum’ah nu patolekasak di tengah tegalan rasa, panundung ujub takabur nu ngahunyud minuhan juru-juru kolbu, pangusir kumaki nu ngadaki lebeting ati.
Urang dugikeun ka Allah robul ‘ijati, pangeran nu Maha Rohman tur Rohim nu saban wanci teu cicing ngamalirkeun asih-Na, nu salawasna tara kendat ngagalurakeun ka heman-Na , nu hamo tiasa kawincik hiji-hijina , pamohalan kapedar bejer beasna.

Kersaning mantena ayeuna urang tiasa ruing mungpulung patepung lawung paamprok jonghok bari gunuluran kabagjaan , limpas ku rasa kabingah tur sehat wal’afiat , amin yaa robbal alamin.

Sholawat miwah salam mugia tetep ngawalungan kalautan jungjunan jalmi pinilih ,nu ngancik parangi utami , insan mulia nu mibanda tauladan anu sampurna , Rosulullah Muhammad saw. Oge… mugi ngamalir kakulawargina anu salamina gumati , muga nyungapan ka para sohabatna anu satia bumela , tur ngucur ka sakur umatna anu turut tumut henteu incah balilahan nincak dina tapak lacak Anjeuna.

Para sepuh pupuhu turus turunan , seuweu siwi rumaja nu mawa terah rundayan , mungguh hirup aya dina papasangan ringkang , mungguh beurang jeung caangna , mungguh peuting jeung wengina , mungguh
cunduk jeung tepungna . Dinten ieu dina wanci haneut moyan ngagayuh ka pecat sawed , panon poe nojo hate nangkeup haneut lelembutan , dipirig hiliwir angin ngajak lunta ka ciibun tina pangeunteupanana, dua kulawarga nyaeta kulawarga bapa
IDI SURASDI (Alm) nu sumping ti Desa


Kutamanggu sareng kulawarga bapa ATA nu di gunung sari patepung lawung paamprok jonghok , rempeg ngariung bari sumirat ku kabagjaan dina hiji pamaksadan , seja ngajugjug jucung ta’aruf , mastikeun jangji pasini bihari, anu kungsi diguritkeun, ngaenyakeun pasang subaya nu ti heula dikedalkeun , enggoning mageuhkeun silaturahim dua insan , cacap mapag waluya jatining bagja, antawis
cep DEDE KUSWAYA putra bapa IDI SURASDI (Alm) sareng
neng TUTI RUSTILAH putri bapa ATA.
Sim kuring minangka nu manggul piunjuk janten juru pangduum , ti payun neda paralun ka sakum anu laluuh , henteu hilap mipit amit ka sugri anu lalinggih, seja sambung lemek, numbu catur, ngaguar
lambar acara.
Para sepuh kadang wargi hormateun sim kuring , supados henteu nyangkolong teuing kana waktos , henteu neukteuk di hadean poe , minangka bubuka sagala purwaning carita , pikeun kembang panganteur lengkah malar janten tarate papaes hate , urang buka tungkus calagara ieu ku maoskeun basmalah sasarengan , bis…………

Saterasna ,malar lengkah ginuluran rahmat mantena, jugjugan puguh jucungna , sumangga urang dangukeun ku ati wening, urang regepkeun ku manah setra , aosan ayat-ayat Al Qur’an , anu bade di dugikeun ku kersana bapak KEKENG.
sumangga dihaturanan.


Hadirin rohimukumullah , nembe parantos kadangu , galindeng aweuuhan ayat-ayat Al Qur’an nu matak tengtrem , nyerep kana lelembutan , ngagalura kana lebah lolongkrang rasa , nganteurkeun dina mitembeyan ngaguar lambaran ieu calagara , mugi aosan anu nembe sing janten pahala kasaean , khususna ka qori’ah anu maoskeunana , oge ka urang anu janten mustami’na. amin ….

Acara anu salajengna bade langsung bae kana akad nikah, margi bakal pangan ten sakalih tos teu sabar hoyong geura –geura lubar, pajarkeun teh sawios acara anu sanesna mah eke bae . Kukituna Ka reng-rengan panitia, hapunten korsi sareng mejana di atur kanggo pelaksanaan akad nikah.Insya Allah akad nikah moal lami deui bade dilaksanakeun , margi nu mancen tugas ti KUA kacamatan kasokandel parantos saged, sepuh puguh tos sapuk, para saksi tos sayogi ti tatadi .

SORA :
Entog sisi hayam gunung, kapinis cangcangkeun bae sok bisi cep DEDE pundung, nu geulis datangkeun bae Datangkeun urang tepungkeun, tepungkeun urang deukeutkeun, deukeutkeun urang raketkeun, raketkeun urang jadikeun. Mung pacuan ulah waka direndengkeun, margi tacan akad nikah. Ka ibu juru rias, sumangga neng TUTI enggal candak kadieu, hawatos ka cep DEDE nu elekesekeng lieuk beuheung sosonggeteun hoyong amprok sareng nu geulis tempat pamontelan hate .
Saterasna calon panganten sakalih miwah ibu rama , kairing ku para saksi sumangga ngalih panglinggihan ka tempat anu utami .

Para sepuh , pini sepuh anu laluuh, sugri anu lalinggih lalampahan nyorang raratan dugi kana mumunggangna , jugjugan muru jucungna cunduk kabukuning taun, datang kamangsaning bulan mustari nitih kawanci. Kawih asih nu balabuh na dasar katineung , Gupay kelar nu eunteup na geugeut kameumeut , Kiwari seja dipatri ku jatu karami, bakal disimpay ku akad tikah. Teu kaci upami dilami-lami, teu sae upami diengke-engke, sok komo teu wasa upami kedah ditunda, kukituna … ka kersana bapa naib saparakanca nyanggakeun sapuratina kanggo ngajeujeuhkeun akad tikahna
cep DEDE sareng nengTUTI


Para sepuh kadang wargi , alhamdulilah wasyukrulillah ku kudrat sareng irodat Mantena, kalayan pangdua ti sadayana , cep DEDE Sareng neng TUTI , kiwari parantos disimpai ku tali akad , duriatna ngabukti na jatu krami

Pidu’a diteda ti sadayana, mugia ieu panganten sakalih sing silih asih, silih asuh, silih asah, waluya walagri , hejo lalakon jodona , reumbeuy carita rumah tanggana, tinekanan ngawujudkeun kulawarga sakinah , mawaddah wa rahmah, du’a sepuh ngiring ngaping tansah ti pangjaring gusti .

SORA :
Para sepuh kadang wargi sadaya, utamina rombongan tatamu nu cunduk ti desa KUTAMANGGU semah nu miang ti kacamatan CIGASONG
angkat nyorang ti raratan ………………………..
Sok sanaos akad nikah parantos laksana, kalayan aya dina kalancaran namung kanggo nyumponan tindak tanduk, usik malik sadaya nu dipaparin rasa, manah sareng lisan, kantenan dina saliring dumadi , teu cekap ku surti sareng tekad wungkul, mung kedah disarengan ku ucap lisan . Nu mawi kitu , mugi teu janten kekeling panggalih rengat manah, disuhunkeun luntur kolbu sesepuh rombongan panganten pameget dilulungsur kanggo ngedalkeun gerentes kolbu.
sumangga dihaturanan .

(biantara ti sepuhna panganten pameget)

Hadirin rohimakomullah , nembe parantos kakuping eces tur bentes , gerentes kalbu ti tatamu , anu didugikeun ku pangersa bapa  guru OPAH

Munasabah cunduk bari alus semu sumping sae parangina, mungguh matak ngaqreug-reugkeun kana emutan , menggah matak bingah mamanahan.
Sok sanaos,

Daun jeungjing jeung sendawa, digantelan kembang gula.
Tangkal jeungjing jeung kalapa, dibeulit ku akar jengkol.
Teu jingjing teu bawa , da sejana bade kumaula.
Teu jingjing teu bawa, iwal mawa nu ngarengkol

Salajengna , piraku nu salam moal diwaler, nu sampurasun teu dirampeskeun , kapan saur kanjeng rosul oge "falyukrim dloifah" , namung sim kuring mung saukur darma, teu wasa panjang nya cumarita , kukituna waler kacindekanana nyanggakeunn kan wawakil kulawargi panganten istri, anu bade didugikeun ku pangersa bapa  WA GURU

Sumangga dihaturanan .
(biantara ti sepuhna panganten istri)

SORA :
Hadirin rohimakomullah,
Kasaksen ku sadayana kitu kotret ti hate ,
Tarate mah sihoreng kembang tarate
Bareng mangkak karembangan
  Sahate sihoreng sahate
  Ragem ngajak bebesanan
JAKA SEMBUNG NGALA PEUTEUY, NYAMBUNG EUY
Nu sumping nu kasumpingan sapatotos sapagodos, sapaneja sapaniatan, sajiad satujuan, seja meungkeutkeun simpay duriat nu mangkak dina jambangan nu janten putra

Cep DEDE ……… Tadi enjing-enjing keneh pisan sateuacana rombongan tatamu sumping, neng TUTI ngaharewos ka simkuring salaku pangjajap acara anu kedah didugikeun ka cep DEDE dipayuneun para wargi sadaya . Ku simkuring teh diwaler insya Allah upami teu hilap ku akang baris didugikeun . Ka para wargi sadaya hapunten nyontang waktos sakedap, margi ari amanat mah upami teu didugikeun dosa hukumna

Cep DEDE …………
Kieu harewos ti neng Tuti teh,
Ulah hariwang pedah henteu cacandakan, asal ulah hilap kana pakarang anu bisa mangpalagang.
Ulah isin pedah sumping ngaligincing, asal ulah lali kana bedil anu ngagawing dina sela-sela pingping,
Oge ulah rumegog pedah jonghok bari lengoh, asal tong poho kana pelor anu nyenghol sajeungkal handapaeun bujal.

Tah cep DEDE … mung sakitu pamundut neng TUTI mah .

Cep DEDE ……….. oge Neng TUTI ……
Alhamdulillah jatu krami tos ngajadi, bebesanan tinekanan .
Tapi …ke…ke heula , wayahna kasep geulis ke sabar sakedap ulah waka ka kamer .

SORA :
Pajar teu jingjing teu bawa, datang bari keupat eundang,
jonghok ukur bari lengoh , sumping oge ngaligincing.
Geuning buktosna teu burung rebo .
Katampi ku astakalih kasangga kalingga murda , sumangga geura ditampi bilih jaheut nu maparin pajarkeun disapirakeun.

Ka ibu bakal panganten sakalih dihaturanan ngadeg heula sakedap, kanggo seren tampi salah sawios cacandakan .

Sumangga ka juru potret nyanggakeun kango ngadokumentasikeun, oge ka juru kamera kanggon ngabadikeun .

Nyanggakeun sabrang salayan , lebet ka cabe mah henteu.
Nyanggakeun hatur lumayan , lebet ka sae mah henteu
Jaza kumullah khoiron kasiron , wa ahsanal jaza, ditampi ku astakalih , disuhun na embun-embunan ,
moal disimpen dihandap-handap, mugia sing janten pancar pangruhay seuneu duriat. Atuh cacandakan anu sanesna sumangga diteraskeun dipataremakeun ku anu sanes .

Hadirin rohimakomullah , acara anu salajengna mangrupikeun acara tali paranti adat kabiasaan urang sunda, diantawisna : sembah sungkem , sawer panganten , niup harupat , sareng nincak elekan enog .
Kanggo mandu ieu acara mangga nyanggakeun sapuratina ka Bapa .................................. sareng ibu JURU RIAS

Para wargi sadaya alhamdulillah acara adat kabudayaan urang sunda parantos rengse dilaksanakeun .

SORA :
Sepuh anu dilulungsur , wargi anu digigingsir , kukulaksan paniatan pamaksadan tinekanan ,rasa bagja ngarandakah minuhan heureutna dada . Namung sagedengeun eta , ku lega karumaosan , Tina seueur katunaan , balatak ku kakirangan .

Shohibul maqosid seja kedal lisan sanduk-sanduk, Nu bade didugikeun ku kersana bapa ……………..
Sumangga dihaturanan

Jika tidak ada yang menyampaikan maka disampaikan oleh MC:

Sok sanaos kitu bapa ATA salaku shohibul maqosid ngahaturkeun wilujeng sumping disarengtan hormat ta’dim kalayan kabingahan anu taya papadana. Saperkawis putra anu jadi tungtung panglamunan panyileukan beurang peuting , amprok jodo sanes pangreremo kolot, estuning pilihanana pribadi kalayan sapuk sareng panggalih sepuh.

Kalih perkawisna dina mangsa dahupna dinten ieu, para bapa, para ibu parantos wening galih meryogikeun sumping, saur paripaos tea mah , dibelaan jalan leueur kundang iteuk, hujan hujan papayungan seja nawiskeun asih andum du’a ka panganten sakalih Sugri pangasih katampi, kasaean mo katanding, kasuhun kapunjung kasangga kalingga murda. Kanggo pangwalesna mah seja disanggakeun bae ka gusti num aha asih.

Hadirin rohimakomullah , isina mah sakalangkung, Kaweningan galih miwah katresnan manah sadaya ditampi ku katunaan . Panampian anu moal boa kirang tata kirang titi kirang duduga peryoga. Tempat anu sakieu buktosna, tuangeun anu kasanggakeun mah duka kumaha buktosna , palias ngamomorekeun , kagaduhmah estu nemrak , sesah disumput salindungkeunana. Kilang kitu pamugi katuang kaleueut kalayan kabingahan.

Pangersa bapa ATA sakulawargi, teu kendat-kendat neda pidua ti sadayana, mugia murangkalih anu nembe dijatukramikeun , pasinina sing ngajadi, subayana sing laksana , ngahiji dina rarabi , waluya rumah tanggana . Mugi geugeut mugi layeut duriat teu pegat-pegat . Du’a sepuh ngiring ngaping tansah ti pangjaring gusti. Amin…, sakitu anu kapihatur , kedal lisan pangbagea, disarengan hormat ta’dim kalayan kacintaan.

Hadirin rohimakomullah , acara anu pamungkas mangga urang sarandekeun hate, nembrakeun rupi pamundut, ka Allah numaha welas asih, mugia sapapaosna ginuluran kabagjaan .
Ka bapa ………………………………….. sumangga dilulungsur kanggo ngajejeran do’a

Salajengna panganten sakalih supados dicandak ka lebet bumi kanggo ngalaksanakeun sarupi deui acara adat nyaeta huap lingkung , urang mah panganten bari wayahna di luar heula.

SORA :

Lalampahan nyorang raratan parantos parat dugi ka tamat, nyingraykeun lalangse parantos rengse, supados urang ayeuna tiasa nyalse.
BUAH TOMAT BUAH PEUTEUY, TAMAT EUY
Boh bilih aya saur nu teu kaukur, basa nu teu merenah, kalepatan ti sim kuring , mugi kersa ngahapunten , tutus langkung kepang halang , bobo sapanon carang sapakan hapunten anu kasuhun .
Sumangga urang pungkas bae ieu calagara ku maoskeun hamdallah sasarengan,
Alhamdulillahhirobbil alamin

As, wr, wb

Rupina nembe teh aya harewos ti urang dapur, aya leueuteun sapulukaneun anu hoyong katuang kaleueut
ku sadayana , sumangga nyanggakeun mung sakitu buktosna, dikawitan ku rombongan tatamu panganten pameget

CONTO ACARA SIRAMAN

CONTO ACARA SIRAMAN
Dina Upacara Adat Nikahan Sunda
Nikah mangrupa acara nu sacral pikeun umat manusa. Kabéh jalma pasti miharep upacara nikahna direuah-reuah sangkan nu liana apal jeung pada nyaksian manéhna jadi raja jeung ratu sapoé. Upacara nikah di unggal wewengkon pasti teu sarua. Sarua ari dina lebah rukun, sarat jeung lebah direuah-reuahna mah. Tapi nu ngabédakeunana dina proses upacara nu lumangsung dina acara nikahna sorangan. Saperti dina acara siraman anu dilaksanakeun tanggal 1 Desember 2008 di Kp. Babakan Baru RT 03/RW 03 desa Cimulek kecamatan Waluran.
1. Bubuka
Bismillah mugi pangeran
ALLOH anu murbeng alam
Raga nyawa diri abdi
Mung ka anjeun sukalindung

ALLOH anu Rohman Rohim
Neda pangaping pangjaring
Cahaya pujaning ati

Abdi sujud mung ka gusti
Assalamu’alaikum Wr.Wb.
Bismillaahirrohmaanirrohim. Alhamdulillaahirobbil’aalamiina washolaatu wassalaamu’aala asyrofil anbiyaa-i wal mursalina, wa’alaa aalihi washohbihi ajma’ina. Amma ba’du.
Bapa kalih Ibu, hadirin nu ku sim kuring dipihormat!
Puji anu jadi mimiti disanggakeun ka Gusti Nu Maha Suci. Puja minangka bubuka carita urang sanggakeun ka Pangéran nu Murbéng Alam, ogé syukur kapihatur ka Gusti nu Maha Ghofur. Anging ku pangersana urang tiasa ditepangkeun deui mugia sing wuwuh caket wuwuh raket, wuwuh dalit ngahijina kawargian urang turta salamina aya dina jalan anu dirodo ku mantenNa.
Teu hilap, solawat miwah salam mugia salamina tetep ngagoloncor ka junjunan urang sadaya habibana wanabiyana Muhammad SAW, ka kulawargina, ka para sahabatna, ka tabi’in-tabi’atna, tug dugi ka urang sadaya salaku umat anu tumut kana ajaranana dugi ka ahir jaman. Amiin.
Bapa kalih Ibu, hadirin anu ku sim kuring dipihormat!
Dina danget ayeuna urang tiasa sumping ka ieu patempatan seja ngahaturan uleman Bapa Sahbudin sakulawargi, anu tangtos anjeuna ngagaduhan maksad seja nikahkeun putrana wasta Néng Asri Sri Rahayu ka Cép Gilang Ginanjar. Nanging aya pamaredih nu janten putra calon pangantén, Néng Asri hoyong husu ngaras ka ibu ramana saurna téh.
Ngaras téh nya éta mundut pangapunten ka nu janten sepuh, malih di salokaan bari ngawasuh dampal sampéanna, éta téh tawis bakti ti nu janten putra ka ibu miwah ka rama. Margi numutkeun katerangan ogé, dina Al Qur’an dijelaskeun, “Alloh moal ngahampura dosa éta jalma, saupama henteu dihampura ku indung bapana”. Ditambah ku katerangan “surag téh aya dina dampal sampéan indung”.
Kitu anu dipimaksud upacara ngaras sumangga urang ngawitan:
Ibu…...Bapa…..bade mundut widi heula (ka ibu ramana).

1.1 Lagu Nimang Pepeling
Anaking…….
Aya deudeuh aya asih
Aya kanyaah nu teu weleh natrat
Mamah jeung bapa
Hoyong mulangkeun panineungan
Ngais hidep panungtungan
Mangga ibu…… miwah……
Candak putra anu masih aya dikamar
Ais ku pangais anu pinuh ku asih
Eyong ku dua pangrujung
Nu pinuh ku kaweningan ati

1.2 NINCAK 7 SAMPING
(mapahna nincak kana sinjang 7)
Emutan deui mangsa lawas,
Mangsa anu pinuh ka waas
Mangsa…..masih dina keukeupan indung jeung bapa
Mangsa sok ngagerendeng

1.3 LAGU AYUN AMBING
(Ngahariring lagu ayun ambing)
Lagu
Ari – ari ayun 2x
Ari ayun deudeuh ayun ambing 2x
Eyong asih indung
Pinuh du’a jeung pangjurung
Kanyaahna bapa
Mo laas ka tilar mangsa.

2. Ngecagkeun AISAN.
Ibu……. Bapa ……….
Sok buka sinjang pangais neng………..
Usapan mastakana
Wangsulan deui panineungan
……. Taun anu tos kalangkung
Ti kawit……. Dikandung
Salapan bulan lamina
Dugika gubrag medal ka alam dunya
……diasuh dieyong diayun anbing

…….anaking
Ayeuna mamah ngecagkeun aisan
Seja ngaleupaskeun hidep
Tina aisan wening jeung suci
Sabab hidep pinanggih sawawa
Rek lumampah dina alam rumah tangga

Bral tedunan
Muga sing kenging pituduh jalan
Enggoning lakirabi
Sing kenging barokah Gusti
Sakinah mawadah warohmah
Amin

Rengse ngecagkeun aisan
Aya bekel anu utama
Pigeusaneun lengkah jaga
Lenyepan aosan ayat-ayat suci al-Quran
Nincak kan acara 

3. WEJANGAN
3.1 (QS Bani Isro’il 17)

Bade didugikeun ku……………
Alhandulilah
Rengse ngaoskeun ayat-ayat suci al-Quran
Eusina lenyepaneun urang

Anaking,…………
Dipayuneun hidep teh aya wadah
Eusina palita tujuh
Caketkeun ka mamah bapa
Pasihkeun korek apina
Seungit paligentos ku mamah bapa
Dugika hurung sadayana
Caketkeun ka hidep
Tiup hiji-hiji dugikeun ka pareumna
Tah etateh ngandung hiji siloka
Mamah bapa nu ti kawit
Teu kendat nyaangan jeung ngadamaran
Mangsa hirup dewasa mah
Lain harti mamah bapa ngaleupaskeun
Tanggung jawab,
Tapi, hidep anu kudu mandiri

Sok ku…… teuteup sing anteb
Raray mamah jeung bapa
Gurat ka nyaah aranjeuna,
Tembres natrat mo bisa pegat
Malih dina manah na mah
Baceo noroweeo
Boa, mun kongang mah hoyong gogoakan
Tawis sukur kanu agung
Mahabah kanu maha kawasa
Bingah tan wangenan
Dinten ieu teh bade walimahan

Padahal asa kamari, asa cikeneh
Hidep di rauk-rauk di hao hakeng
Dimandian,di popokan
Di ais,di eyong,di ayun ambing Teu karaos,ayeuna cunduk waktuna
Hidep rek pisah ti mamah ti bapa
Bral anaking………
Kolot mah ngan sambung du’a
Muga salamina aya dina rido
Miwah panantayungan ALLOH S.A.W
Anaking…………
Sidik,tue kudu dibeuli
Kanyaah mamah bapa,nyata teukudu di penta
Clik putih clak herang
Caang bulan opat belas
Jalan gede sasapuan

Nanging, masih emut anaking,…..
Kalangkang anu maha suci atra di alam gumelar
Ulah silo ku panenjo
Ulah samar ku paningal
Munjung teh lain ka gunung
Muju, ulah ka sagara
Taya deui anu kedah dipilari
Di satungkebing langit,
Atawa di teangan di satangkaraking jagat
Iwat ka tempat asal ngangancik
Ka wiwit gelar dumadi
Nyatana, ka mamah, ka bapa

Tong ditingal sareat warugana
Tong di tilik tina harta jeung bandana
Komo deui mun ukur mindingan era
Etamah sandiwara dunya
Indung tetep indung
Moal bisa di sumput salindung
Bapa, angken sajalantrahna
Mo bisa direka yasa
Mun hidep ngangken indung ka batur
Dosana hamo kaukur
Pon kitu, nyangken bapa kanu lain
Awal ahir, bakal aya balitungan

Sabab, do’ana indung jeung bapa
Saciduh metu,saucap nyata
Kitu ceuk wewengkon carita
Sabab indung anu ngandung
Anu ngagelarkeun hirup

Anu parantos kageuleuhan kakeumeuhan
Diruruba, diririba, ngaraksa, ngariksa
Ngaping ngajaring boh siangna boh wengina
Estu satia bumela, ti lahir dumugi batin

Bapa anu ngayuga, nu jd marga lantaran
Lahirna hidep ka alam dunya
Bapa anu nyareatan narekahan
Sangkan hidep hirup hurip mulus nanjung cageur lahir bageur batin
Ngadidik ngabina, mekelan ku elmu ahlak

Tah ayeuna pisan waktos
Meungpeung hate cangra bengras
Dihibaran kaimanan
Di caangan nur ilahi
Di saksian ku sadaya kadang wargi
Prak,hidep kudu tungkul sumujud
Meungpeung bapa mamah masih aya didiekeuna
Hidep kudu ngarasa bagja
Mun aranjeuna tos teu aya mah
Ngorehan mah ukur kana tutunggulna
Pendak ge, nu jirim ukur batu nisanna
Ukur kembang jeung cikeundi

4. NGUMBAH DAMPAL SAMPEAN INDUNG BAPA
4.1 DAMPAL SAMPEAN INDUNG
Anaking……
Prak geura kumbah dampal sampean mamah
Bari ngucapkeun bismilah
Nyungkeun sembah dina manah
Neda rido maha agung
Ka Alloh Gofururrohiem
Ka asma anu maha akbar
Geura sumujud babakti
Niat neda pangampura, ti anjeuna

4.2 SUNGKEM MUNDUT PANGAMPURA TI INDUNG
Jemplang Karang
Duh mamah sembaheun abdi
Cukang lantaran gumelar
Mugi manah mamah rido
Ieu……seja ngaras
Ngawasuh dampal sampean
Sumeja sujud ka indung
Neda jembar hapuntena

Bersihkeun dampal sampeana
Prak geura sungkeum sing anteb
Na pangkonan mamah

Jemplang ceurik
Duh indung tunggul rahayu
Wiwitan gumelar diri
Nun indung papadang ingsun
Ieu abdi seja babakti
Tawisna karumaosan (duh mamah)
Ti lahir dumugi batin

Deudeuh…..anaking
Puputon sosoca kalbu
Mamah ngahampura pisan
Mugi do’a mamah di kabul ku Gusti
Dina mangsa hidep ngolah rumah tangga
Sing tapis ngawisik diri
Saladar laratan awak
Hate disangkeh ku soleh
Tong urun kaberung napsu
Tong ingkah kabawa-bawa
Indung mah ngan darma ngandung
Hidep teh titipan yang widi
Nyanggakeun sadaya-daya
Agung pangersa nu maha kawasa

4.3 NGUMBAH DAMPAL SAMPEN BAPA
Ayeuna ngalih ka bapa
Prak wasuh dampal sampena
Gerenteskeun dina ati sanubari
Bapa teh sembaheuh hidep
Anu ngajurung tileuleutik
Nu ngayaga ti bubudak
Panteg dugika denget ayeuna

4.4 SUNGKEM MUNDUT PANGAMPURA TI BAPA
Jemplang karang
Mugia widi ti gusti
Manawi……..,sumujud
Babakti sumerah diri
Seja ngaras ka salira
Ngawasuh dampal sampean
Mo kasaha mundut du’a
Anging ka salira bapa

Anaking………
Geura duku nyu’uh nyalu’uh
Mundut doa dina pangkonanna

Jemplang ceurik
Duh bapa bagal waluya
Nu miasih siang wengi
Nun bapa papadang rasa
Nu miheman lahir batin
Talaga rasa ka tresna (duh bapa)
……..neda dihapunten
Anaking………..
Kanyaah bapa keur hidep
Teu ngitung rudet berewit
Teu luntur teu watesdeukeut jeung jauh
Du’a bapa restu indung
Ngajurung ka bale nyuncung
Mangku lana tepung bagja
Kuat takwa kandel iman
Sujud ka Alloh ka Rosul
Sangkan jaga dina ngajalankeun rumah tangga
Salawasna aya dina rido Alloh

5. Pamungkas ngaras
Alhamdullah, puji sinareng sukur kanu agung parantos lugina manah urang sadayana kasaksian ti kawit dugi ka ahir
Pamundut neng….. tadi kenging widi wening ati ti ibu miwah ramana.
Mangga uarang lajengkeun kana acara siraman.
Ieu oge mangrupi simbol silokana rasa ku cara ngucurkeun tirta sesetra, banyu urip kahirupan kanggo ngabersihkeun salirana neng……, sangkan suci lahir batin panglokat raga sukmana
Neng……,candak ka tempat pangsiraman

5.1 (bentangkeun sinjang anu 7 sing kadampal paligentos)
Aping ku ibu ramana calikeun sing merenah.
Sayogikeun kanggo nyawer sapuratina
Pirigan kacapi suling

5.2 Hariring wening
Aduh gusti anu agung
Mugi maparinan widi
Barokah sing mapat manjang
Aduh…...,kanggo pun anak
Mamah bapa ngucap Du’a
Di barung hujan ci soca
Jajap hidep nu rek lunta
Muga…..,mulya waluya.

5.3 (aoskeun solawat)


6. SIRAMAN

Urang sebatan heula anu bade nyiraman

1. Mamah
2. Bapa
3. Aa
4. Teteh
5. ………..

Diteraskeun kana :

6.1 Kanggo nyawer engke sarengsena siraman

1. Mamah
geura bismilah
cur kucurkeun banyu kahirupan
doakeun,……sing aya dina kalancaran
taya halangan harungan.

2. Bapa
Gayung anu ngandung simbol siloka
Lain ukur eusi cai saujratna
Tapi anu paling utama
Ngucurkeun doa keur putrana

3. A,……
Teu kanyaah anu sajati
Ti lanceuk kanu jadi adi
Mugi sing jadi panyipuh diri
Nikah,….. aya dina rido gusti

4. Teh,…..
Tirta anu setra bawa ti kudrat
Muga sing jadi pang lokat
Batin urang ulah pisah ulah pegat

5. ……………
Sing jadi panghudang sari
Sing geulis mawa ngajadi
Geulisna terus jadi ati
Mulya walagri




SUSUNAN ACARA

SIRAMAN

JL.SUPLIR VIII NO 2 RANCAEKEK

1. Bubuka medar tujuan
1.1 Minang Pepeling
1.2 Nincak 7 samping
1.3 lagu ayun mbing
2. Ngacegkeun Aisan
3. Wejangan
3.1 (QS Ban Isro’il 17)
4. Ngumbah dampal sampean Indung Bapa
4.1 DAMPAL SAMPEAN INDUNG
4.2 SUNGKEM MUNDUT PANGAMPURA TI INDUNG
4.3 NGUMBAH DAMPAL SAMPEN BAPA
4.4 SUNGKEM MUNDUT PANGAMPURA TI BAPA
5. Pamungkas ngaras
5.1 (bentangkeun sinjang anu 7 sing kadampal paligentos)
5.2 Hariring wening
5.3 (aoskeun solawat)
6. SIRAMAN
6.1 Kanggo nyawer engke sarengsena siraman
7. AlAT ANU DI BUTUHKAN

1 BUBUKA BIANTARA SIRAMAN

Para ibu, para bapa, para wargi, sepuh anom jaler istri anu ku sim kuring dipikahormat. Pangluhung kalbu, kajembaran manah. Puji anu janten panggeuing ate. Puja anu janten panggugah rasa, puji sumangga urang sami-sami sujudkeun kanu maha suci,Alloh Robul Jazaki Puja kagungan anu maha kawasa, Alloh adza wajala.
Anging pangersa miwah rohmatna urang pinarengan tiasa ditepangkeun deui mugia sing wuwuh caket wuwuh raket, wuwuh dalit ngahijina kawargian urang turta salamina aya dina jalan anu dipirido ku manten-na.
Kalih ti eta, mugi-mugi solawat sinareng salam, tetep dilimpahkeun ka junjunan urang sadayana, kanjeng nabi Muhammad SAW ka kulawargina, ka para sahabatna, ka para karabatna, tug dugi ka sadaya umatna, anu tumut sareng ta’at ka anjeuna, dugi ka ahir jaman amin ya robal alamin.

2 BUBUKA BIANTARA NGARAS + SIRAMAN

Bismilahirohman nirrohim
Sugrining puji anging kagungan Alloh S.W.T urang sadayana wajib muji ka mantena neda pitulung, kalayan miharep ampunan. Mangga urang sami sami nyalindung tina sagala rupi anu sifat sasar sinareng kaawonan, anu nyangkuruk dina hate urang
Saestuna, jalmi anu diaping ku mantena moal leungiteun tapak jeung saranggem pon kitu deui,sing saha nu di sasarkeun tinagtos moal kenging pituduh.

3. BUBUKA BIANTARA RAJAH

RAJAH
Pun ampun kanu maha agung
Ngaweuhan ka mahdab papat
Neda pangaping pangjaring
Ka luluhur jeung ka dulur
Ka sakumna nu nyakseni
Utami ka para ahli
Nya ieu rajah pamunah
Pamunah nu rek ngarimah

Pun sepuh ti puser kalbu
Kelbu wening humariring
Hariring pangeling ngeling
Eling ka wiwitan diri
Eling ka ringkang ka tukang
Eling ka mangsa bihari
Eling ka mangsa kiwari
Bari nyawang nu rek datang
(ahung……………….ahung)

7. ALAT ANU DIBUTUHKEUN DINA SIRAMAN

1. Kembang 7 rupi
2. Palita 7 sumbu
3. Damar tempel 1
4. Kendi esi cai kahuripan 1
5. Samping kebat 7 + 1 pangais
6. Jajambaran
7. Anduk alit
8. Korek api
9. Saung panyaraman
10. pawung
11. Bakar + payung
12. Samak pilihan
13. Mayang jambe
14. Hanjuang

Bubuka nampi calon panganten

Bismillaahir rohmaanir rohiim
Assalamu'alaikum Wr. Wb.
Alhamdulillahi robbil aalamin, Wabihi nasta'iinu alla umuurid dunia waddin. Was sholaatu wassalaamu alla sayydina Muhammadin khootaminnabiyyin, Wa aalihi wa shohbihii ajma-'iin.

Langkung ti payun, sim kuring kalayan asmana bapak/ibu ……………………………. Sakulawargi, ngahaturkeun wilujeng sumping ka Ibu miwah Bapa…………… anu janten sepuhna calon panganten pameget, pon kitu deui ka sugri anu nyarenganana. Tutut gunung keong reuma sumangga geura lalinggih.

Pinisepuh, piderekan, para wargi anu sami hadir.
Dinten ieu ping ……………………………., mangrupi dinten anu kebek ku kabagjaan utamina kanggo kulawargi bapak/ibu ………….. miwah kulawargi ibi/bapa ……………………….., atuh urang oge anu ayeuna sami-sami riung mungpulung seja ngiring bingah, seja mintinkeun prasetya kawening ati geusan rumojong ngandum pangdu'a dina nyakseni pamaksadan anu parantos disimpay ti anggalna ku dua kulawargi.

Kukituna saparantos reureuh palay, pepes kesang, bada mudun/nanjak ti ………………….. ka ………………….., sok sanaos anu sumping parantos sampurasun pon kitu deui pribumi parantos ngarampeskeun, nanging

supados kahartos naon rupi pamaksadan tatamu, sumangga ka sesepuh rombongan calon panganten pameget dihaturanan ngadugikeun pamaksadanana

Rumah Tangga

R angkulan kadeudeuh di kulawarga
U lah rek luntur ku usum.. laas ku jaman
M un pareng pinanggih jeung goda rancana
A was.. singhareupan ku sabar jeung tawekal
H armonisna rumah tangga gumantung kanu ngalakonannana

T ujuan rumah tangga lain keur ngumbar hawa napsu
A nu jauh tina sakinah mawaddah warohmah
N ajan kabutuhan sagala kacukupan
G euning teu jadi ukuran harmonisna hiji rumah tangga
G iligkeun pikir ka Gusti nu Maha Suci
A nu jadi udagan bisa pinanggih jeung kabagjaan

Mungguh hirup laki rabi
Lir kapal jero jaladri
Garwa minangka layarna
Caroge lir juru mudi
Di lautan satujuan
Sapapait samamanis

Guruan mah lauk laut
Sanajan caina asin
Awakna teu katepaan
Mandiri dina pribadi
Mangpaat keur anu lian
Jadi pamungpungan asih

Kade...
Galura ombak kahirupan ...
Lir ibarat walungan nu caina umpal - umpalan
Bisa nilemkeun sing saha bae.. teu cacah teu menak
Mun geus tikelebuh hese nulungannana.

Kuring Pasrah

Haté melang nyorangan nyawang ka tukang bray kalangkang, waas kagagas,
nyamper poe isuk di papag balebat ka béngbat, miceun katineung ngajangelek ka keuheul,
Haté hariwang sorangan, teu aya batur teu nyampak dulur, di baturan ku dalingding angin peuting, di pépéndé ku simpé, bisi isuk teu ka samper bisi pagéto teu teu ka waro,
Kedah kamana mawa awak nitip diri.?
Kedah kamana nyieuh ka sieun miceun ka tineung,?
Kedah kasaha nyieup teuteup nyimpay talatah.?
duh Gusti.......
Mung ka anjeun abdi sumerah diri, pasrah sumeurah ......... Kana taqdir diri.

Anaking - kenging ki sunda sawawa

Anaking...
nu namina hirup di alam dunya
moal langgeng dina hiji martabat..
susah .. senang.. bagja sareng cilaka
estu campuraduk pagaliwota..
nanging ,,, tetep hirup mah kedah lumangsung..
teu aya deui,, iwal ti sumerah pasrah ..
ka Allah nu Maha Heman

kade...
galura ombak kahirupan ...
lir ibarat walungan nu caina umpal - umpalan
bisa nilemkeun sing saha bae.. teu cacah teu menak
mun geus tikelebuh hese nulungannana..

ingetkeun...
mungguh hirup laki rabi
lir kapal jero jaladri
garwa minangka layarna
caroge lir juru mudi
di lautan satujuan
sapapait samamanis

prak guruan mah lauk laut
sanajan caina asin
awakna teu katepaan
mandiri dina pribadi
mangpaat keur anu lian